秋葉原限定 馬沙轉行賣啤酒?

作者:Demi    發表日期:2017-07-10 20:05:04

之前介紹咗,嚟緊日本老麥嘅開心樂園餐送Pokemon玩具,嫌Pokemon太細路仔?唔緊要,如果你係高達鐵粉,今個暑假會去秋葉原朝聖嘅話,都有新Gimmick令你唔敗家唔安樂!

位於秋葉原嘅Gundam Café有新搞作,一連推出三款新飲品,分別係百式啤酒,以及紅彗星馬沙專用渣古與老虎嘅無酒精雞尾酒,好唔好飲,小編未試過唔敢斷估,反正賣點係個杯先啱,好似紅彗星與老虎雞尾酒,分別調校成紅色與藍色,襯成透明杯上印上嘅馬沙專用渣古與賴巴嘅老虎頭像圖案;最吸引都係百式啤酒,杯身印有百式頭像嘅輪廓,以及招牌式嘅黑超形眼罩,例入滿滿嘅啤酒後,就可得意還原金光閃閃嘅百式原有形象。至於收費方面,每款飲品連特別版酒杯誠惠1,620日圓,百式嗰款依家已經有得供應,而紅彗星渣古與老虎雞尾酒,就於本月14日加入,計我話,Cosplay做馬沙或者賴巴上尉入去歎番杯,一定更加有feel,想知點去、幾點開舖等等詳細資料,可到官網 http://g-cafe.jp 瀏覽。


本文來源:http://hk.on.cc/hk/bkn/cnt/lifestyle/20170710/bkn-20170710140059447-0710_00982_001.html




Tag:
本文鏈接:http://www.datingmum.com/18546.html