好波有潛質!壞孩子翻生靠標準流浪

作者:Helena    發表日期:2017-06-27 01:02:06

過去多次提供機會,讓「失意軍人」得以重新出發的標準流浪,新一季堅持大膽作風,一口氣簽入曾因紀律問題而影響發展的「好波之人」卓耀國、黎洛賢和劉卓軒,總監李輝立有信心做好「保母」角色,讓3名「壞孩子」盡展所長,重返正軌。

「標準」和「流浪」在新一季港超將會復合,並繼續一直以來重用年青球員,以及給予失意軍人機會的作風,而剛簽入的3個「壞孩子」既年青又失意。「我講親球隊限米煮限飯,啲人就話我刻薄,你問吓新簽呢3個係唔係4,000蚊一個月囉!『阿國』(卓耀國)、『BB』(黎洛賢)同『卓軒』(劉卓軒)3個嘅共通點,都係好波有潛質,但就一時諗唔通,畀自己一啲陋習影響前途,我唔想嘥咗佢哋,大家傾咗幾次,約法三章,大家畀個機會大家,我會好似個保母咁睇實佢哋!」

助卓耀國黎洛賢劉卓軒返正軌

現年23歲的卓耀國上季北上加盟R&F富力,期間表現出色,以7個入球成為球隊首席射手,惟季尾被指擅自離隊,以及紀律問題而不獲續約。至於22歲的黎洛賢以腳法細膩見稱,上季作客標準灝天為香港飛馬射入的1球,季後更成為「最佳金球」第2位,惜傳聞季中因紀律問題而被領隊奇雲邦特打入冷宮,季尾更公開批評會方而不獲留用。3名「壞孩子」中最年長的劉卓軒經已25歲,出道之初曾獲各界看好,惜後來因暴飲暴食而自毁前途,近季雖獲南華羅致卻鮮有上陣機會,新季因南華自降,一度與「阿國」和「BB」面對無班落危機。

「簽埋佢哋3個,球隊組軍亦都七七八八,外援亦已經同摩域治及上季喺港甲踢東昇嘅莊尼亞(足總譯名為祖連奴)達成咗合作協議,心目中想簽多個中場同前鋒,但人選就等教練團決定。」據悉標準流浪新一季會由外籍教練執教,暫定下月16日開操。


本文來源:http://hk.on.cc/hk/bkn/cnt/sport/20170627/bkn-20170627000910020-0627_00882_001.html




Tag:
本文鏈接:http://www.datingmum.com/16631.html